Draque

jueves, 27 de agosto · 20:00

Gijón · Toma 3

Gratis

«Hai coses nueves, coses vieyes y coses que camuden pa meyor». Con eses pallabres el tríu de folk de cámara Draque avanzó nes sos redes sociales daqué de lo que va poder sentise nel so próximu conciertu. La banda formada por Celia Corrales (voz y pandereta), Celia Nieto (vigulín) y Julio Rodríguez (bouzuki) va actuar el próximu xueves 27 d’agostu nel Toma 3 de Xixón, dientro de la convocatoria qu’abrió llocal pa programar actuaciones d’artistes llocales. Esta actuación tien llugar dempués de dellos meses ensin que’l grupu actuare en directo y va ser la primera que dan tres d’asoleyar el pasáu xunu en plataformes dixitales la primer grabación d’un tema propiu: ‘CN-10 (Bele-bele & Pol.los)’ . «¡Prestaríanos un montón qu’acutarais la fecha y vos arrimarais pa compartir esti conciertu nel que tamos poniendo muncho enfotu! Nos prósimos díes daremos más info y dalguna pista más de lo que vais poder sentir», añadió’l tríu na so publicación d’Instagram pa destacar lo especial del directu de la próxima selmana. Draque nació en xunetu de 2021 cuando Pepín de Muñalén y Xel Pereda xuntaron a los sos trés componentes pa participar nel Ciclu de Folk de Cámara Ígor Medio de Xixón. Daquella, Corrales, Nieto y Rodríguez yeren trés nomes prácticamente desconocíos de la escena musical asturiana. D’entós p’acá, foron incorporándose a otros destacaos grupos (Corquiéu, Llan de Cubel, Entós, La Ciudá nel Mar, Mediaoreya… ), ensin desdexar el tríu que nació naquella xuntanza. Pasaron cinco años d’un camín sele, pero firme y constante , d’ensayos, de conciertos nos que defenderon con xeitu la so propuesta… Y el xueves 27 nel Toma 3 va poder vese’l reflexu de la etapa nueva del tríu.